Arishi küm 13 kar smartphone addict akümba atema yaridar

New York, April 15 (Agencies) : Technology amshitsü yimya kanga mejungi sübaa temang nung tashidak ka amai akümba jenti kümogo. Tang ya US nung tanur arishi küm 13 tain kar smartphone onsara tali amshiba aser video games teti dang asaya aliba tashidak (addict) jungdangtsütsü atema yaridar, ta osangbenertemi ashi.
Alima anüolen tesem nung iba amala tashidak yariba tesem kaji Seattle ansa aliba reSTART Life Centre kija ya lir aser yangji digital technology balala agi addict kümer aliba lanurtem yarir, ta Hokolbarnü osangbenertemi metetdaktsü.
Yangji arishi küm 13 nungi 18 pur tashi yariba tesem dang Serenity Mountain ta ajar.
“Tanur nem item electronics osettem amoktsüba ajanga parnok tebilemba melenshidaktsür, kechiba süra item oset nung arakzüba, sentsü aser ola adokba jagi parnok pua-er aser parnok dak aliba shitakba yimyatem nembanga yutsür,” ta reSTART Life Centre nguteter Dr Hilarie Cash-i ashiba osangbenertemi metetdaktsü.
Item addict kümer aliba tanurtem ya shilem balala lemsar anepalur.
“Hopta 8 nungi 12 tashi nung iba lanur aser par kibong yimyatem kanga junga asayadanga putettsü meranger,” ta restart-i ashi.
Iba mapang par kibong nung digital amshiba yimya asadanger aser ibaji mozü koba agi taneptsü angutsü itemji putettsü asoshi inyaker. Karbo ita 12 tashi amungtsüsa akümer.
Smartphone onsara tali amshiba ajanga nija taküm, lokti aser pei mapa inyakba tesem nung timtem aika adoker, ta Information Systems Journal-i nung shia lir