Syria:Yim azüngteta yutsür aoba gari amakdang nisung 22 asü

April 15, 2017 nü Syria army aser sorkar anema rarartem tsüngda al-Rashideen, Aleppo province nung tenangzütep ka agiba sülen al-Rashideen, Aleppo province, Syria Kefraya aser al-Fouabus yimtsüngtem azüngtetadaktsür yangji aliba nüburtem anir aoba bus garitem anasa Sorkar anema rarar ka nokdaka aliba noksa nung angur. Item yimtsüngtem azüngtettsü tenangzüktep agiba sülen Honibarnü Aleppo-i aitsü aliba garitem nung bomb ka pokloktsüdang tajemba agi nisung 22 asü aser aika yiru.

Damascus, April 15 (Agencies) : Honibarnü Aleppo, Syria nung yim azüngteta yutsür aoer garitem nung bomb pokloktsüdang tajemba agi nisung 22 asü aser aika yiru.
Osang ajanga ashiba agi, sorkar anema rarartemi amanglemer aliba Rashideen tesem nükjidong sür pokloktsüba bomb jagi nisung 48 yiru.
Iba bomb ya Shia nunger yimtsü ana azüngtetba nüburtem adenshiba tesem nung taküm bendanga agütsür kati pokloktsü. Iba nisung jagi truck gari ka anir arua iba bombji pokdaktsü.
Shia nunger nisung 5,000 aniba bus garitemji sorkar kübok aliba Aleppo tesemi belener aotsü asoshi temelaba tejangja atatepa lia iba lendong atalok.
Sorkar aser sorkar anema rarartem tsüngdai Iran, Turkey aser Qatar linüktem tiyongi aita lemtetba inyakyim ya sorkar anema rarartem kübok aliba Shia jila aser yimtsütem nungi nüburtem kümzüka anitettsü asoshi renemba lir.
Iba melena Madaya aser Zabadani nung aliba sorkari anema rarar kibongtem sorkari Idlib province-i yoktsü nangzüker liasü.
Item yimtsüng azüngtetba maparenji Hokolbarnü nungi tenzük, ta osang ajanga ashi.
Shia nungerji sorkar anema rarartemi amanglemer aliba Rashideen jila tonger liasü aser sorkar anema rarar kibongtemji sorkar kübok aliba Ramouseh, Aleppo tonger liasü.
Anatsülen nungi aruba garitemji apusotsü lia Rashideen nung aliba sorkar anema rarartemi takhangba tasen ka agüja Shia nunger mena aliba garitem sota ayu aser parnok garitemjia Ramouseh nungi marakzüi liasü.
Shia nunger anir mao tsüngda Kafraya aser Foa nungi Shia nunger atema rarartem tama atsüngindakjang ta sorkar anemertemi takhangba ka agütsü, ajisüaka iba takhangbaji mataloktsü.
Yamaji atatepba mapangji temang nung timtem alir nisung asembo süadok, ta tenük kuli angur kati ashi.
Pai, chiyungtsü aser tzü junga chia mejemi ghonda 24 tashi bus nung aliba mapang tetsür asem tashi bus gari telung nungji tanur aso, ta ashi.