MP Verma Cup nung Nagaland team runners-up asü

Tesüiba mapang India nungi cricket asayartem, Dilip Vengsarkar, Surinder Khanna aser CAB general secretary, Aditya (achiji) nungertem den Nagaland team külemi tangokba noksa ka yangi angur.

Patna, April 15 (Agencies): April 12 nü Patna nung MP Verma All India Invitation Unity Cup nung Nagaland team Jharkhand den final asaya liasü. Kanga dang jangratema asaya ka nung Nagaland team-i Jharkhand team wicket 6 agi makok. Iba asayamung nung over 40 dang asayaa liasü.
Asaya nung Nagaland team captain Imliwati-i toss koka mezüng bat asütsü asoshi shimtet aser parnoki over 40 nung run 198 yanglutet. Iba asaya nung taoba mapang India nunger cricket asayar Dilip Vensarkar aser Surinder Khanna na densema liasü. Nagaland team-i parnok dang nungi tajungba telok ka den kanga junga asayaba ngua dena kanga süngmanga liasü. Aji süaka ajaki imla aliba ama Jharkhand team-i over 38 buba nung wicket 6 agi Nagaland akok.
Iba asaya ya Nagaland nungi aoba telok kati All India asayamung nung final tongtetba mezüngbuba lir. Final madong tsüngda Nagaland team Mizoram, Bihar aser Manipur den asaya liasü.
Iba asayamung ya secretary, Aditya Verma lenisüba kübok Cricket Association of Bihar (CAB)-i achaayanga amung. April 4 nung 12 tashi Patna nung asayaba moapu 2 nung asayaba asayamung nung telok ajak agi 12-i shilem agi.
Nagaland team nung asayartemji; Imliwati Lemtur (C), Hokaito Zhimomi, Tahmeed Rahman, Jalaluddin, Sedezalie Rupreo, Shampri, Richu Dev, Mughato Chishi, Teni Chishi, Inakato Zhimomi, Nadeem, Imlikaba, Allem aser Liremo Patton nunger liasü.
Maneni iba asayamung nung Nagaland team nungi spinner Tahmeed Rahman-i wicket 11 agia pa wicket timtiba agiba sempet ngua liasü. Pai asaya ka nungbo wicket 5 tashi agia liasü.