Manipur nung Jayentakumar-i Minister menden toktsüba shidi agütsü

Imphal, April 15 (Agencies): Chief Minister N. Biren Singh-i meinprongba anema Manipur nung Minister L. Jayentakumar-i pa menden toktsüba shidi ka agütsüba ajanga Manipur nung BJP-i aniba ita ka sorkar atema mepetmesü ka adoka lir.
Jayentakumar-i ashiba agi pai Chief Minister Biren den jembiogo aser pa Mongulbarnü state-i meyipa aruba sülen tatembang telemtetba ka agitsü.
Jayentakumar-i Health portfolio den tanga department asem tashi amsema inyaka liasü aser pai osangbener dang ashiba agi, Mongulbarnü Chief Minister Biren Singh Delhi nungi meyipa aruba sülen tatembang telemtetba ka agitsü.
“Pa malidang telemtetba ka magitettsü” ta Jayentakumar-isa ashi.
Biren-i meinprongba anema Hokolbar nikongdang pai minister menden yutsüba shidiji agütsü, ta paisa shisem.
Chief Minister Biren Sinbh-i iba onük bentettsü atema Delhi-i ao ta osang angazüker.
Pa indang official maparen nung Biren-i teka aiba aser meinprongba atema pa jashir ta Jayentakumar-i Chief Minister dang ashi.
Biren-i Department of Personnel Minister in charge bena lir aser pai Jayentakumar den asüngdangya mesüi Health Director, Okram Ibomcha mapa nungi anentsüba atema Jayentakumar-i mepelar.
Ibomcha aitsüba kuli tejangja maliasü aser pa mapa nungi anentsüba shidi nung ‘disciplinary actions’ atema anentsür ta dang shia lir. Ibomcha ya taoba Congress Chief Minister Okram Ibobi Singh’er kinunger ka lir.
March 15, 2017 nü Manipur nung Bharatiya Janata Party(BJP)-i aniba sorkar tentetdang National People’s Party (NPP) nungi MLA 4 densema liasü aser par pezü rongnung Jayentakumar ka lir.
Jayentakumar-i Dr Rajo, family welfare director nem interim Health Director inyakdaktsünüa ashi saka ibaji magizük. Külen, pai Law Minister mapa bena liaka, Biren Singh-i Advocate General ka shimdang pa den asüngdangya mesüi shimba atema mepelai liasü.
Chief Minister-i iba nisung ana shimba ya agienra, Jayentakumar-i maneni minister ka ama inyaktsü mulungtsü akok.
Jayentakumar-i mapa nungi anenba shidi züluba nung, Chief Minister-i pa ministry nung züngokba atema pelar, saka pa nem lemzüktsüba mapa nungi meinprongba ajanga pai alizüng ayuba tonga meinyakter, ta shia lir.
Maneni, Uripok nungi NPP MLA, Y. Joykumar-ia chief minister den mepelaba osang kar angazüker.
Joykumar ya taoba Director General of Police ka lir aser pai tang Deputy Chief Minister mapa bena lir. Pai Home portfolio aginüa liasü saka Biren-i iba mendenji shinga nema magütsüi dang pai bena lir.
Manipur nung BJP-i aniba teloktep sorkar nung March 15 nü BJP, NPP, Naga People’s Front (NPF), LJP aser Congress (party melen) nungi MLA 9 tashi minister menden nung shim. Iba sülen March 23 nü Minister 3 aser Parliamentary Secretary 12 shimlok.