Australia nung Muslim telok kati Khristantem amak

Sydney, April 16 (Agencies): Australia kübok Sydney yimti nung Muslim nunger teimba sür aliba tesemtem nung Khristantemi Khristan tamaitsü noksatem odia bener mesenzüktsü atema tekümdangtsü osang metetdaktsüogo.
Taoba hopta tu nisung pezüi Greek Orthodox Christian ka dak teka sangshi aser pa tekong nung kangki ka azüka aliba endoktsü. Nisung pezü indang tereprangtsüji Middle Eastern nisungtem ama liasü.
Par pezü jagi tejak nung atsüng, teberem aser tapubang nung azük ta Greek Orthodox Christian jagi police dang ashi.
Iba mapang pa tetongi pa kümzüktsü merang saka idangji Arabic oshi jembir tetsür anati la dak teka sangshi aser metsü ta tetsürlaia police dang ashi.
Nisung pezü jagi Yisu indang tenüng sensatsü aser “Allah” den atishia jembi, ta Daily Telegraph osang ajanga metetaktsü.
Baptist Pastor George Capsis-i ashiba agi, tesüiba ita 6 tashi Sydney nung trokben tashi Khristantem amaker.