Alima nung tantsütila Emma Morano süogo

Rome, April 16 (Agencies): Alima nung tantsütila aser 19buba putu nung asortem rongnungi tatembangtila, Emma Morano arishi küm 117 nung Italy Verbania jila nung Honibarnü süogo.
Emma Martina Luigia Morano shiba Arishi küm 117 aser anog 137 iba lima nung liasü, la 1899 November ita 29 nü Italy, Civiasco jila nung soa liasü. La ya arishir kibong ka nungi lir. La tetsü aser tetsütanutsü na prongla arishi küm 90 dak tema liasü aser la teyi Angela arishi küm 100 tashi liasü, ta osang ka ajanga metetdaktsü.
Lar semchir ajanga ashiba agi, lai alima rangben rara anaprongla ajangshiogo, iba den külemi Pope 11 aser Italy tir 12 meteta liasü. La süngjem süngjema asüba osang semchir ajanga shisem.
“La taküm tangar dang nungi balaka liasü. Onoki la tejakleni aotsü asoshi tashi aser timtem lendong ajak koktetsüba yimya bener aliba teti belimtettsü,” ta Verbania indang Mayor, Silvia Marchionin-i ashi.
Yamaji arishia liaka la taküm nung timtem aika ajurua aruogo. Lai lar kinunger parnok 8 tashi ajateta ali. Alima rangben rara mezüngbuba nung la tetong süadok aser iba sülen la mezüngmeshia amshiba nisung ka den kibong küma liasü, shiba lai memeyim, ta osang ka ajanga metetdaktsü.
Maneni la kinungbo den mebala tsüngta lar tanur ka dang aliba süadok aser iba sülen la kicha dang liasü aser küm 65 tashi ‘Jute factory’ ka nung inyak.
La chiajemba yimya nung kanga dang tesüngmangtsü kaji, anogo shia küm 10 tashi lai entsü tazü asemsem chia liasü.
La doctor ajanga ashiba agi, lai süngolemba kangabo mechinü aser timba ka amtsük dang chia liasü.
2011 küm la nem ‘Order of Merit’ award agüja liasü, aser la tesüsabuba tasoba anogo amongdang linük nung Tir, Sergio Mattarella aser Pope Francis nungi tenüngsang osang agüja liasü.