Snapchat amshitsü asoshi India kanga sensaker: CEO

Mumbai, April 16 (Agencies): India nung Snapchat download süa amshir timba akümba mapang ka nung iba sapang tuluba küma odaktsütsü asoshi India ya kanga sensaker lir, ta Snapchat indang CEO-i ashi.
2015 küm iba app renlokba indang jembiba senden ka nung Snapchat indang CEO, Evan Spiegel-i iba o ya ashi.
Snapchat nung mapa inyaker kati India nung iba app amshir timba akümba ya kanga meilongi renlokba idang asüngdangba mapang, mapa inyaksang indang o meshitemdang, “Iba app ya takar atema dang lir aser iba sapang ya India aser Spain ama sensaker linük nung tuluba küma aotsü tejangraba mali,” ta Spiegel-i ashi.
Shishilembaba nung India ya kanga karaa renloka aoba mapang ka lir aser internet amshiba nung India ya 2020 tashi nung shilem 2.5 agi tali renloktsü yimlar. Aser iba ajanga Amazon, Uber, Masayoshi Son aser Jack Ma company tem ajanga India nung sen dollar billion aika indoker.
Spiegel-i iba o ya shir senden nungi ayazüka alu, ta osang ajanga ashi.
Osang ka ajanga ashiba agi, taoba küm India nung Snapchat amshir ya million 4 liasü aser anu timba kümer alitsü südi ta yimlar. Whatsapp amshir ya India nung million 200 tajunger dang lir.