Pasasa aniba garitem tendangtsü asoshi Apple nem temelaba agütsüogo

San Francisco, April 16 (Agencies): California nung pasasa aniba garitem tendangtsü asoshi temelaba agütsür rongnung Apple tensemogo, ta ketdangsertem osang ajanga metetdaktsü.
Pasasa aniba gari yanglutsü nükjitong aliba olen ka Apple company nung tekolakba, Tim Cook-i shisema lir saka company ajanga osang tejangja kicha shia mali.
Taoba küm Apple ajanga sorkar dang pasasa aniba gari yanglutsü asoshi temelaba meshia shidi züluba mapang item garitem yanglutsü asoshi senotsü aika indoka bushisüngdangba indang shia lir.
California nung aliba Apple company ajanga software yanglutsü aser iba company den külemi inyakba company ajanga gari yanglutsü yimlar.
Gari yangluba company aser technology telok aikati pasasa aniba gari yanglutsü asoshi kanga meranga maparen balala inyaktepba mapanga lir aser 2020 tashi nung takok ngutettsü yimlar.
Iba amala gari yanglutsü asoshi General Motors indang ‘research centre’ tasen ka San Francisco nung amenloktsü atema sen million $14 indoktsü aser mapa tasen 1,100 adokdaktsütsü, ta sangdongogo.
General Motors indang Cruise Automation unit-i California, Arizona aser Michigan tesemtem nung item gari tendangba mapang ka lir.
Pasasa aniba gari yanglutsü asoshi gari yangluba company Ford, Nissan, Mercedes-Benz aser Toyota temia bushisüngdangba mapang ka lir. Uber aser Alphabet telokia yamaji bushisüngdangba mapang ka lir.
‘Mobility innovations’ aser technologies asoshi Continental-ia tawa ‘research centre’ ka Silicon Valley nung amenloka lir.