N Korea-i missile tendangba takok mangu

Washington, April 16 (Agencies) : Deobarnü North Korea-i missile ka tendangtsü merangba takok mongutet, ta US aser S. Korea ketdangsertemi ashi.
North Korea-i parnok indang tongtibang anogomung ka nung missile tasen aser launcher tem military parade akaba mapang sayuba sülen tananü iba missile tendang, ta osangbenertemi ashi.
Parnoki iba missile ji North Korea anüdoklen aliba Sinpo nung tendangtsü merang, ta South Korea nunger ketdangser kati ashi.
Iba kasa tesem nungi parnoki tan ita tetenzüklena ballistic missile ka tendangba ‘Sea of Japan’ nung alua tsük. Iba tzü dang ‘East Sea’ taa ajar.
US Pacific Command-i, Deobar aonung parnoki missile tendangba ka putetogo, ta ashi.
South Korea aser US intelligence ketdangsertemi iba missile ji tapu koba liasü ibaji putettsü merangdar.
Aji oda süaka iba missile tendangbaji parnoki asü masüar ano North Korea nungi osang tejangja kecha maru, ta osangbenertemi ashi.
Pyongyang aser Washington na tsüngda mangatettep adoka aliba mapang ka nung Tir Donald Trump-i taoba hopta ‘aircraft carrier USS Carl Vinson’ den ‘strike group of vessels’ North Korea tzüleni yoka liasü.