Brexit sülen UK longjemer:Theresa May

London, April 16 (Agencies) : Deobarnü Britain Ato Kilonser Theresa May-i, linüki European Union (EU) nung madentsü vote asüba sülen tang longjemer, ta ashiba osangbenertemi ashi.
“Linük asoshi koma asünung ajungtsü ta kanga süoki ia otoktep jenti akaba sülen tarutsü asoshi bilema tejakdang aliba maongka agitsü asoshi nüburtem longjemdar,” ta May-i la Ato Kilonser mendeni tur mezüngbuba Easter osang abendang ashi.
Roman Catholic Arogo nung putir ka jala, May-i Khristan ka intetba yimya aser lai angazükba taochi, lokti aser sensopur aria bilemba indang ashidang, item yimya ya asenok ajak asoshi lir, ta shisem.
“Item yimya ajak ya Khristantemi anogo shia benshiba yimyatem lir,” ta lai ashi.
Taoba mapang Britain Ato Kilonser, David Cameron-i yaküm Easter anogo nung linük rangben longjemer nokdaktsü aser Khristan ka akümket yimya wazüka ayutsü shia liasü aser kasaji laia tanü jembisem.
Lai, UK sobalibaji kanga takang lir. Yangi tamangba yimya balala agizükteter aser pei teshinüba shiteter. Asenoki alima rangben nung aliba Khristantem aser nübu agi tangar memenepba tamangba yimsütem asoshi bilemtsütsüla, ta May-i ashi.
“Nüburtem pei amangnüba sadoka amangdangtsütsü aser parnoki amangba kecha tetsübu melii lemsatepdaktsütsü asoshi asenoki yaritsüla,” ta laisa ashi.
Opposition nungi Labour Party lenir Jeremy Corbyn-i, Easter indang yimjung osangji alima rangben nung kanga arisanga meproktettsü südi,” ta ashiba osangbenertemi metetdaktsü.
Corbyn-i, Alima nung alir amangbapur ajaki Yisu temeim aser taküm tenla agütsüba tatishitsü tulu bilemteta alitsü. Pai asen menen adokba aser yimjung bener arutsüba Easter osang tajung ajaki bilemteter. Easter ya Yisu Khrista kangki dong nung sür anogo asem lir külen tasü madak takok ngur shia aruba anogomung lir, ta ashi.