Kohima nung 44buba KODH foundation day mungogo

KODH nung alir tanurtemi 44buba foundation day sentong nung ken ka ajanga shilem agiba noksa nung angur. Kohima, April 16, 2017.

Kohima, April 16 (TYO): Easter Sunday anogomung, Deobarnü Kohima nungi kilometer 5 pilar aliba KODH nung Kohima Orphanage and Destitute Home (KODH) küm 44buba foundation day mungogo.
Iba sentong nung jembidang KODH Chairman, Neibanuo-i, “Kohima Orphanage and Destitute Home ya kütsü asür, Zaputuo-ii Angami-i 1973 küm iba anogo nung tentet, aser tanü April 16, 2016 nü küm 44 ajunger,” ta metetdaktsü.
Laisa, taruba küm trok nungbo (2023 küm) KODH-i Golden Jubilee benjungmung amongtsü, ta ashi.
Neibanuo-isa, tang iba Home nung alirtem parnok 93 lir ta metetdaktsüba den külemi taküm tanur teneti NBSE kübok Higher Secondary School Examination (HSSLC) tatidang agütsüogo aser tadidang result atadar, ta shisem.
Laisa, küm aika tsüngda iba Home den yaritepertem dang pelaba olen ka lemsatep.
Foundation day sentong nung KODH nung alirtemi iba anogomung indang temeja ken ka aten.
Helen Zaputuoii leniba nung iba sentong agi aser John Zasituo-i tepela anküp o jembia liasü.
2016-17 küm atema Best inmate award ji tang Class 8 nung azünger, Mark nem agütsü. Pa kenübo doctor akumtsü nükjidong lir.
KODH tentetsang aser KODH Tir, Ama Zaputuo-ü Angami 2011 küm March 24 nü arishi küm 89 alidang alima nungi pilaa liasü. Asür Zaputuoü Angami-i mangdang tajung yur Kohima Orphanage and Destitute Home ya 1973 küm tenzük aser la asüba anogo tashi (küm 38 tashi) iba home ya achaayanga liasü.