VHP-i nashi tepsetba, nashishi achiba nokdangtsü

Panaji, April 16 (Agencies): Deobarnü Vishwa Hindu Parishad (VHP)-i taruba küm ana tsüngda Goa nung sorkar teyari magii nashi tepsetba aser nashishi achiba khenyongi nokdangtsü ta metetdaktsüogo.
VHP-i Bajrang Dal aser Durga Vahini activist tem teyari agia state nung iba tenokdangba agütsütsü, ta VHP lennir Radha Krishna Manori-i osangbener dang ashi.
“Linük nung tangalen ama, Goa nunga onoki nübortem nashi tepsetba aser nashishi achiba anema tesayuba agütsür. Nenoki küm ka mesüra ana ata liang, onoki Bajrang Dal aser Durga Vahini züngsemtem teyari agia nashi tepsetba nokdangtsü” ta Vasco jila nung Manori-i osangbener dang ashi.
Ayodhya nung Ram Temple yanglutsü atema sentong ka nung adentsü atema Manori ya Vasco-i aruba liasü.
“VHP-i nashi tepsetba mesüra nashishi achiba nokdangtsü atema sorkar shinga indang teyari magitsü, kechiyong onok kübok – Bajrang Dal aser Durga Vahini nati ibaji inyaktsü tashi lir” ta paisa shisem.
Hindu nunger nashiji “tetsü” ka ama külemer aser VHP-i ‘dharma raksha’ yimya benshi aser iba nung ‘gau raksha’ densema lir. Bajrang Dal aser Durga Vahini ajanga VHP-i nashi tepsetba nokdanger. Onoki sorkar nungi teyari kecha memeshir, ta Manori-isa ashi.
“Hindu loktilibai aginüba ama onoki inyaktsü. Goa nung onoki nashi tepsettsü mesüra nashishi achitsü memelatsü” ta paisa shisem.