Bendanglen PM-i taoba sorkartem aitsüba ya taaktsü ka: Congress

New Delhi, August 17 (Agencies): Bendang linük, UAE nung Ato kilonser Narendra Modi-i, “Telemtetba magitetba aser tashi-mieti lulaba tebilemtsü ya ni taoba sorkartem dang nungi senmang amang, saka ibaji melenshitsü asoshi ni inyakdagi,” ta jembiba aija tanü Congress-i, linük yimtenren inyakyim indang bendanglen alidang pai kakteta mejembitsüla, ta shiogo.

Ato kilonseri pai atsünga aliba menden temaba akhümji ayutsüla. Linük nung alidang pai taoba sorkartem aija jembiba nungbo kecha tashishitsü mali, ajisüaka bendang linük nungbo pai yamaji mejembitsüla,” ta Congress otongdar Meem Afzal-i ashi.

Afzal-i, Ato kilonseri taoba mapangtem nung jembibaji opposition-i ashishiaka pai bendanglen alidang linük yimtenren indang jembibaji tim masü, ta ashi.

Tang Ato kilonser Modi UAE linük nung lir aser yangji pai alima nung Muslim nunger tekülem ki ‘mosque’ tulutiba jenjang asembuba nung aliba Sheikh Zayed Grand mosque semdangogo, aser iba dak sentakba nung Afsal-i, pai India nunga mosque semdang nungbo koda jungla, ta ashi.

Ano Congress Party otongdarsa Sanjay Jha-i twitter ajanga, “Bendanglen alidang Ato kilonseri maneni opposition aija jembiba ya kanga majung. Iba ya taaktsüka lir,” ta ashi.