Dimapur Police-i kümdangtsü metetdaktsür

Dimapur, April 19 (TYO): Dimapur nung aliba Printing Press, Rubber Stamp vendors aser iba dak sendaka aliba dokan kiburtemi Government Office aser Officer nungi temelaba melii Official letter pad aser Seal tem yanglutsü memelar, ta Addl. Dy Commissioner of Police/PRO Dimapur-i sangdong ka nung metetdaktsüogo.
Iba tetuyuba sülen manidakertem aser ozüngi memelai yangluba Official letter pad aser Seal tem tim mesüi amshiba putetra ozüng kübok temerenshi alitsü, ta sangdong nung shia lir.
Maneni, nübortemi dokan, store aser shi ayokba tesemtem nung non-certified weights & measures amshia külakoktsüba nungi jenbua alitsü metetdaktsür, ta Dimapur Police sangdong nung shia lir.
Dokantem nung weights & measures tim mesüi amshiba osang police nem metetdaktsütsüla. Dokantem aser talisa shi ayokba tesemtem nung lijaliyongertemi iba inyakyim amshiba putetba osangtem angazüker, saka parnoki police den ken o mebenoker.
Iba dak sendakba nung Dimapur Police nung Zone-II kübok April ita ya “Weight & Measure” ita ta ser amunger aser aibelenertem aika pua ozüng tapet kübok temerenshi agütsüogo, ta Addl. Dy Commissioner of Police/PRO-isa metetdaktsü.