IFFCO Hon Jubilee nüngtem nung sentong ka agi

Bodbarnü Niathu Resort nung IFFCO Hon Jubilee sentong nung Managing Director, IFFCO Dr. U.S. Awasthi-i stall tem sema senzüdang agiba noksa angur.

Dimapur, April 19 (TYO): Indian Farmers Fertilizer Co-operative Ltd (IFFCO) küm 50 ajungba küm nüngtem nung Bodbarnü Niathu Resort, Chumukedima nung sentong ka ayongzüka agi.
Iba sentong nung tongti tesemdangerji Managing Director, IFFCO Dr. US Awasthi liasü aser pai o jembidang ashiba agi, IFFCO ya aluyimertem atema telok ka lir aser linük nung yimtsüng tia nung aliba nisungtem aser aluyimertem ajungkettsü atema mapa jenti inyaka arur.
Küm 50 ajungba jubilee tenüng nung, November 3, 2016 nungi Kalol nung benjungmung tenzük aser linük kübok tesem ajungalen aluyimer aser teyaritepertem den ajurutepa sensaksemtsü. Benjungmung nung agriculture aser cooperation dang masü saka art & culture nunga temulung agütsütsü, kechiyong IFFCO-i art & culture ajungkettsü atema-a mapa inyaker, ta Dr. Awasthi-isa shisem.
Iba sentong nung IFFCO-i iffcoyuva.in ta ser portal ka tenzük aser iba ya yimtsüng nung aliba lanurtem tashi itdaktsütsü atema lir. Iba sabang ajanga lanurtemi parnok skill metettsü aser ajungkettsü atema maongka angutsü.
Tanü agiba sentong nung tongti tesemdanger Dr. Awasthi-i aluyimer 5 aser cooperative 6 nem sempettem lema agütsü.
Sentong nung Secretary, Department of Horticulture, Alan Gonmei, IAS-i aluyimertem ayongzüka jembidang, chemical fertilizers melena bio fertilizers amshitsü ashi.
Sentong nung Managing Director, Nagaland State Cooperative Bank Imtilemba Longkumer, General Manager, NABARD Ashok Chakraborthy, Joint Director, Department of Agriculture Bendang Yanger, aser Department of Cooperative Societies Joint Director Lemba Chang nungertemia o jembi.