Temjen Toy-i FONSESA dang Nagaland renloktsü atema inyaktsü ayongzük

Kohima, April 19 (TYO): Additional chief secretary & finance commissioner Temjen Toy-i Confederation of Nagaland State Engineering Service Association (FONSESA) dang tim teinyaktsütem indang alizüng ayutsü aser state renlokba nung shilem agitsü ayongzük.
Kohima nunug FONSESA indang lokti senden nung o jembidang Temjen Toy-i ashiba agi, tanga service associations den medemdangra FONSESA-i kanga dang tashi itta maparen inyaksangshia aruba angur aser iba asoshi tenüngsang agütsür.
Züngsemtem aser department balala nung ketdangsertemi loktiliba aser state sorkar den yariteptsü atema FONSESA-i mapa inyaktsüla. Nenok koba tesem nung mapa lemzükjaka, nenoki technical mapa nung mapang endoktsüla, ta paisa ayongzük.
Paisa, engineer tem dang mapa inyakertem asütsü aser mapa inyakba den külemi maparen ketdangsütsü aser reprangshimtsü ayongzüka liasü.
Sentong nung Engineer-In-Chief, NPWD, Er. Khupi Natso-ia o jembidang, linük yangerba mapa nung engineers aser technocrats ajanga tongti mapa inyaker aser asen state renlokba nunga engineer tem indang tebilemtsü tulu lir, ta ashi.
“Terenlok atema atongba sentong nung technical back up medenra, amajok dang lir. Sentongtem takok ngua inyaktettsü atema policy, planning & designing shitak alitsüla” ta Er. Khupi-isa ashi.
FONSESA president Er. R. Temsutemjen Aier-ia o jembidang, Nagaland nung technical department balala nung inyakba engineer temi roads & transportation, power, public health, mining amala wadang balala nung tongtibang shilem agir, ta ashi.
Sorkar aser nübortemi asenok dang nungi tuluka imlar, anungji asenoki ibaji tongteta inyaktsüla. Mapa takok ngua inyaktettsü atema asenoki tamasa bendanga agütsütsü aser asen mapang aser tashi ajunga agüja mapa inyaktsüla, ta Er. R. Temsutemjen-isa ayongzük.
Sentong nung mendenji FONSESA vice president Er.Shikato Sema liasü aser FONSESA joint secretary Er. Wapangnaro Imchen-i anküp tepela o jembi.