Monte Carlo Masters nung Murray round asembuba tongogo

Monte Carlo, April 19 (Agencies): Teka yirur ita ka dak tali asaya keta nunga shilem magiteti aruba sülen Bodhbarnü, Monte Carlo Masters nung Andy Murray-i 7-5, 7-5 agi Gilles Muller madak takok angu.
World No. 1, Murray-i ghonda ana majungdang Muller ya tsükdaktsü aser tasembuba round-i iogo.
Saka arishi küm 29 tain, Scotland nungeri service nung kanga tashimait liasü aser pai ‘double fault’ 8 tashi agütsü.
Set anaprong nung asaya tetenzüklen Murray-i makoktsü amai liasü saka asaya tatemlen pai meranga asayaba ajanga takok ngutet.
Murray teka yirur March 12 nung Indian Wells round tanabuba nung Vasek Popisil-i tsükdaktsüba sülen tang ya mezüng asayar.
Asemben tashi Monte Carlo Masters nung semi-final tongtetsang, Murray ya yiruba ajanga 2017 küm junga masayateti tenzük aser tang season nung pai asayaba nung Dubai marok kisüng bena lir.
Tasembuba round nung Swiss nunger Stan Wawrinka tensemogo aser pai tanabuba round nung Czech nunger Jiri Vesely madak 6-2, 4-6, aser 6-2 agi takoki angu.
Grand Slam takok marok asemben tashi bena alisang, Wawrinka-i Monte Carlo marok agizüker küm asem süyiogo aser iba mapang pai par medemer, Roger Federer madak takok ngua liasü.
Tanga asaya nung Austria nunger Dominic Thiem-i Dutch nunger Robin Haase madak 6-3, 6-2 agi akok aser Czech nunger Tomas Berdyich-i arishi küm 39 tain, Tommy Haase madak 3-6, 6-1 aser 6-4 agi takok angu.
Iba asayamong nung Pablo Carreno Busta, Alexander Zverev aser Albert Ramos-Vinolas nunger ajak takoker rongnung densema lir.