Zunheboto aser Asukhuto na nung auer anana apu

Dimapur, April 20 (TYO) : Tongtibang tatalokba ka nung Zunheboto police temi jila nung ita aika auyaa jajaba nisung ana, Akaito Assumi aser Pito Murru na April 2, 2017 nü apu. Tena ya Zunheboto jila nung alir aser tena ket nungi tenati auyaba oset 85 tashi ngutetogo, ta Addl. Superintendent of Police/PRO, DEF Zunheboto : Nagaland sangdong ka ajanga metetdaktsü.
Sangdong ajanga ashiba agi, tenati auyaba rongnung motor bike, computer, electronic osettem, gas cylinder kar, aser kidang joka nung amshiba osettsüset kar dena liasü. Tenati item osettem ya jila tesem balala nungi ita aika nung auyatenba liasü.
Akaito Assumi aser Pito Murru na yagi tenati auyatsü nükjidong aliba ki aser office temji anüngdang kanga junga mita reprangtsü aser aonung tzüngsang tera majungba mapang iba maongkaji agiasa timba auya. Tena apuba ajanga Zunheboto nung auer tebilemtsü melii kümogo, ta kasa sangdong ajangsa ashi.
Sangdong nungsa, ano tatalokba tanga ka nung Asukhuto jila nunga Atoi Sumi aser Kikaho Aya na auyaba atema April 1, 2017 nü KPA Campus (Khelhoshe Polytechnic Atoizu Campus) nungi apu, ta shia lir.
Tena ket nungi tenati auyaa aliba mobile phone tem aser blanket kar nguteta lir, ta sangdong ajangasa metetdaktsü.