Bihar Election nung menden 12 dak tajemba magitsü: NCP

Patna, August 17 (Agencies): Tanü NCP-i Bihar nung secular teloktep dang, Bihar election atema menden lemsa-a alibaji August 20 nü tashi nung tanaben reprangshitsüla, aser parnoki assembly menden 12 dak tajemba magitsü, ta metetdaktsüogo.

“Menden lemsaba nung onok angutsü tim melemzüktsü. Iba ya onoki magizüktettsü. August 20 tashi nung tanaben reprangshimtsü asoshi onoki secular teloktep nem mapang latettsür, aji mesüra onok asoshi lenmang ajak lapoka lir. Telemtetba agitsüji parnok melung,” ta tanü Patna nung NCP General Secretary Tariq Anwar-i ashi.

“Onoki menden 12 dak tajemba magitsü. Ibaji onok takhangba aser ibaji agizükba mesüra magizükba ajanga onok teloktep nungsa adentsü asü mesüra toktetsütsü, iba telemtetbaji agitsü,” ta Katihar nungi Lok Sabha züngsem Anwar-i ashi.

Bihar Chief Minister Nitish Kumar lenisüba Secular teloktep nung JD(U), Rashtriya Janata Dal (RJD), Congress Party, NCP aser Samajwadi Party (SP) nunger lir. Iba teloktep ya taruba Bihar assembly election nung BJP-i aniba NDA anema tokteptsü asoshi loktepba lir.

Taoba Bodhbar nü state nung assembly menden 243 lemsaba osang sangdonga liasü aser NCP nem menden asem lemzüktsüba agi parnok tenük masünger.

Teloktep party tem tsüngda menden lemsaba nung JD(U) nem menden 100, RJD nem menden 100, Congress nem menden 40 aser NCP nembo menden asem dang lemzükja liasü.

NCP sentokbaji ajanga iba party nüngdaka mali ta temaitsü sayur, mesüra ‘Muslim tejak’ ka menüngdaker ta temaitsü sayur, ta Anwar-i ashi.

“Onok maden yonga takok angutsü ta parnoki bilemer asütsüa akok,” ta paisa ashi.

Menden lemsatsü asoshi par party bo mejaok mesüra osangbenertem senden nunga mejaok, ta paisa shiogo.

Teloktep party temi külemi ayongzükba osangbenertem senden nung Kumar, RJD tongti Lalu Prasad aser Congress Bihar in-charge C P Joshi nungeri jembia liasü.