Thanwalo küm 10 tepoukdak ayutsü

Kohima, April 20 (TYO): 2015 küm Thanwalo Magh-i arishi küm 61 amitsür ka tashiyim amshia taküm raksatsüba tatalokba sülen küm ka ser tesadang shi lir tatemsa district session court-i iba ken o nung pa aija küm 10 tepoukdak ayutsü obendang agütsüba den külemi senchi 10,000 chiogo.
Tanü nikongdang state sorkar tenüng nung Public Prosecutor (PP), Kathu Rengma-i pa indang office chamber, Kohima nung osangbenertem den jembia liasü.
Pai ashiba agi, principal district & session judge, Y. Maongkaba Imchen-i kulitem tejangja nguteta April 11 nü iba tetuyuba agütsü.
Arishi küm 28, Thanwalo Magh anema aibelen onük ana- tashiyim amshia raksatsüba aser yirutsüba nung ajemdaker ken o benok, ta PP Kath-i ashi.
Kath-isa, Investigating Officer (IO) Livinuo Sub-Inspector aser lar teloki iba ken o bushisüngdangba maparen junga inyakogo, ta ashi.
“Tamalen ama masü saka tawabo Nagaland nung tashiyim amshia taküm raksatsüba ken otem kanga bulor, aser iba ama aibelen ken o dak sentakba nung court-i takoksa angur, nübur aser police amalitep nüngdaker,” ta paisa ashi.
Kath-isa sensotem dang, ozüng kübok aibelenertem nem temerenshi agütsütsü atema court den amalitepa inyakdaktsüner, ta mepishia metetdaktsü.