Dmr nung left-surgery camp tenzükogo

Dimapur, April 21 (TYO): Eden Hospital, Dimapur nung Mission Smile den NEEPCO Ltd. aser National Health Mission, Nagaland-i nungita Hokolbarnü nungi tenzüka hopta ka piyong free cleft-surgery camp tenzükogo, aser iba camp ya NEEPCO DGM, Prasenjit Pookan-i lapokja liasü.
Tang mezüng Dimapur nung iba ama camp ya ayonga akar aser iba camp ajanga nisung aika taküm nung temelenshi bener arutsütsü imlar.
Medical charity mission ya 2002 nung tenzük saka 2009 küm nungang northeast state tem nungbo inyaker, aser iba mapang nungjagi tenzüka Nagaland nungi patient 20 densema northeast nung surgery 16,000 dak tema agitsüogo, ta Sr. Manager Mission Smile, Runa Rafique-i metetdaktsü.
Laisa, iba camp nung surgery agir tesadang ka shibo ano surgery khen agitsüsa akumtsü, kechiyong parnokji cleft lip aser cleft palate naprong timtem lir, ta ashi.
Nagaland state nütsüng apidangra state nung küm shia tebang-mechi chimar asor kinü tanur 100 shi lir, ta laisa ashi.
Eden Medical Centre MD, Dr. Lima Imchen-ia, iba camp ajanga nisung aikati menüremtettsü aser aika inyaktettsü, ta ashiba den külemi hospital staff tem dang iba camp nung yariteptsü atema asüngdang.
Anogo tenetnü camp nung patient 70 shibo surgery agitsü imlar. Iba surgery angati agitsüba dang masü saka patient tem teindokba sen ajak sentong ayongertemi agütsütsü.
Nagaland nung tebang chimar alir, cleft patients 3,000 shi lir ta bilemer. Alima nung tanur 700 asoba shia nungi tanur kabo tebangmechi chimar asor.