Manipur nung ‘Tribal Movement’ tenzüker anogo 600 buba ajunger

Imphal, April 21 (Agencies): Manipur nung ‘tribal movement’ tenzüker anogo 600 buba ajungba tenüng nung Joint Action Committee Against Anti Tribal Bills (JAC-AATB)-i April 22, 2017 nü sentong ka ayonga agitsü.
“Manipur nung taoba Congress sorkari anti-tribal bill asem benokba sülen lisopurtemi pei sasa ketdangsüa aotsü asoshi mapa inyaktsü tenzük. Iba maparen tenzüker April 22, 2017 nü anogo 600 buba ajungtsü” ta JAC-AATB sangdong ka nung metetdaktsü.
“Ozü lisopur mang 8 nem tetushi agüja ano marem yua lir aser ajaki mulunga agizüktsüsa telemtetba ka ano magiteti lir” ta parnokisa ashi.
“Anogo 600 buba ajungba tenüng nung Joint Action Committee Against Anti-Tribal Bills (JAC)-i Lamka jila nung aliba Salpha Pumbuk nung anepdang 11:00 ako nungi Mass Mourning & Fasting Prayer sentong agitsü” ta JAC-AATB-isa metetdaktsü.
Iba sentong nung JAC-i public ajak arua adentsü aser Tsüngremi tanü tashi len anir aruba atema tenüngsang agütsütsü mepishia metetdaktsüogo.
Iba anogo nung media, electricity, medical (medical emergencies), airport pick up & drop, jelia ayonga aliba sentongtem aser tatidangtem dak alaka dokan, shishilembdak aser rejutem ajak shibangtsü aser gari mesenzüdaktsütsü, ta JAC-AATB-isa ashi.