Kaket zülurtemi NDA kübok linük meimba onük aitsür

Dehradun, April 22 (Agencies): Dehradun nung literature festival tatembangbuba anogo, Honibarnü linük nung kaket keno zülurtem aser shisashirtemi Centre sorkari nüburtem rongnung tesempa proker, ta bangjem.
WIC India Dehradun Community Literature Festival nung “Nationalism in Digital India” onük nung o lemtepba mapang nung kaketzülurtem- Nayantara Sehgal, Nandita Haksar, Harsh Mander aser Kiran Nagarkar nungeri linük meimba onük nung Centre sorkar aitsü.
Onirji journalist, Rana Ayyub liasü aser o toktepertemi iba sentong nung ‘digital putu nung linük meimba’ onük nung jembitsüla liasü saka NDA sorkar kübok linük meimba onük nung ang o toktep.
Nüngtugu kaketzülur aser shisashir, Kiran Nagarkar dang, US Tir Donald Trump’er America aser Narendra Modi’er India indang tebendang nung tebilemba kar lemsateptsü asüngdanga liasü.
United State nung “Muslim nunger nokdangba” nung ajemdaker Nagarkar-i, “Tamangba lokti ka anema nokdakbaji tim masü,” ta ashi.
Paisa, linük meimba indang pai mesükshir, ajisüaka India nunger ka asüba atema nüma atanger, ta ashi.
“Ni India nunger ka asüba atema nüma atanger saka linük meimba onükji ni mesükshir. Ni India ji nüngtugu linük ka mekümdaktsüner. Iba dang nungibo ni India ya ajak meimtepba, akhümtsübutepba aser ajak temeten kümzüka ayuba linük tajung ka dang südaktsüner,” ta ashi.
Iba sentong nung nüngtugu school balala aika nungi kaketshirtema dena liasü.
Ato kilonser, Narendra Modi’er sorkar kübok nüburtem rongnung tesempa proker, ta aija Nagarkar-i, “Sorkari tasüngdangbatem sempar,” ta ashi.
Ano taoba mapang Sonia Gandhi-i aniba National Advisory Council nung züngsem, Harsh Mander-i, tawa linük nung linük meimba onük nung tangatetbatem nung o kanga tokteper, ta ashi.
Paisa, “Iba linük ya shirnok meyong? Aser ibaji kechi telatetbatem nung ajemdaker? Linük meimtsü atema kechi inyaktsüla,” ta asüngdang.
Paisa, “India meimba tetezü, linük ya ajak meyong lir” ta ashi.
“Ajisüaka kari, India ya nütsüng timba aliba, Hindu nunger meyong ta jembiba mesüra na yangi linüra na Hindu nunger asütsüla ta asübaji tai. Iba linük ya asen tetsü-tebou nungertemi aginüba ama linük ka masü. Ano Hindu nunger tangatetbatem benoktsü atema shibai lemteter?” ta India dak sentakba kaket aika zülua alisang, Mander-i ashi.
Iba sülen maneni kaketzülur nüngtugu, Nayantara Sehgal-ia, linük meimbaji kanga ilaa kümogo aser tagidak maka kümogo, ta ashi.
“Talenba nungi salar (nüjiso) küm 70 tashi lir tang ajungbena linük meomba indang süa arutsü nüngdak mali. Tang iba yimyim (linük meimba) ayimertem- sorkar tashi nung aliba party-i India-i nüjiso atema raradangbo kecha nunga shilem magi. Parnok yipten nung dang mejanga liasü. Süra kechiba tangbo parnoki ayimtener,” ta lai lokti dang asüngdang.
Laisa, yimsüsüba party-i (BJP-i aniba NDA) parnok tangatetba Hindutva nung ajak nem ai-aura kadaktsüner, aser iba nungji ai-aura makartembo NDA yimsüsüba kübok takoksa angur, ta metetdaktsü.
“Linük nung ‘facist’ yimsüsüba lir. Muslim nunger aser nütsüng ajema aliba tamangba loktitem anema inyaker,” ta laisa ashi.
Sehgal-isa, linük nung kaketzülurtem aser shisashirtem tepsetba ajanga 2015 küm lai Sahitya Akademi award meyipa agütsüba indang metetdakja liasü.