IPR Parliamentary Secretary-i Dimapur DPRO office semdang

Dimapur, August 17 (TYO) : August 17, 2015 nü IPR Parliamentary Secretary, Khekaho Assumi-i District Public Relation Officers’ Office Dimapur semdang.
Khekaho-i tang mezüngbuba atema DPRO Dimapur Office semdang aser tanü pai office taktang ajak reprangdang aser takümsa office building yanglushitsü merangtsü ta nangzük.
Paisa DPRO office nem sound system tajung agütsütsü ta ashi aser technical section nungi taginüba osang ashibatem pai süoki ia inyaktsü ta nangzük.
Nagaland nung Dimapur district ya kanga mazüngi aliba district ka lir aser Dimapur nung mapang shia sorkar sentong balala agir. Pa IPR Parliamentary Secretary inyakdang tajungba nung yariteptsü ta Khekaho-i ashi aser paisa DPRO Dimapur staff temi pei mapa nung nendaka inyaktsü ajungshi.
Tanü agiba sentong nung DPRO Dimapur Lolano P. Khuvung-i IPR Parliamentary Secretary dang pelaba metetdaktsü.
“IPR Parliamentary Secretary mesüra Minister incharge kati Dimapur DPRO office semdangbaji tang mezüngbuba lir aser nai onok semdangba ajanga onok tali ajungmesor aser Dimapur district dang masü saka state atema tali meranga inyaktsü” ta Lolano-isa ashi.