All Ward Union Mokokchung Town lokti senden agiogo

Mokokchung, April 22 (TYO): Yashi indang jembiba nung mapang meindoktsüla, saka mulungsentsü melenshir tarutsü indang bilemtsüla, ta taoba Additional Development Commissioner Dr. Temsüwatii tayongzükba ka agütsü. Pai iba o ya All Ward Union Mokokchung Town (AWUMT) sanen lokti senden sentong ka nung tongti tesemdnager o jembidang metetdaktsü.
“Mokokchung ya yimti (city) tajung ka akümtsü ngujem tulu angur aser ibaji tamakoktsü mapa ka masü, aji oda, iba mapaji asangsang akümtsü asoshi Mokokchung nung aliba ward lenirtemi anir telungjem nung terenlok mapatemji inyaktsüla”, ta paisa ashi. “Mokokchung yanglutsülaji All Ward Union dak tuluka keta lir”, ta paisa shisem.
“Mokokchung town tashi ita ora, Aor lokti tashi aittsü. Idangji dang land of pioneers (samanir lima) ta tangari jembibaji mesüka akümtsü”, ta paisa ashi. “land of pioneers ta jatsüba ya khuret tulu lir”, ta paisa shisem.
Paisa Mokokchung town renloktsü atema tebilemba kar lemsatepdang, state, central aser International fund ajanga rongsen lenmang bushitsüla, sentong (policies) tajung atongtsüla, mapa tenzüker tom nung manentsüla, akhi shisatsü toktsür mulungsentsü melenshitsüla, nisung shiai pei tata mapa angatettsüla aser tongtibangsa tanishir tajung nüngdaker, ta ashi.
“Yashiji ogo, yashi indang jembiba nung mapang meindokli, saka tarutsü atema bilemdi”, ta paisa tayongzükba ka agütsü.
Sentong nung AWUMT tir Wb. R. Ayim Longkumer, Alempang Ward Chairman Wb. Rongpangwati, Mokokchung Municipal Council (MMC) Superintendent Wb. Pangjung, Ao Senden tir Wb. C. Angang Jamir aser Mokokchung Town Lanur Telongjem (MTLST) tatong tir Wb. Mar Lkr parnokia mapang tatsütsü agia tepela o den tayongzükba o balala bener arua lemsatep.