Shri Ramakrishna Society Hon Jubilee among

April 22, 2017 nü Dimapur nung Urban Development Advisor, SI Jamir-i Ramakrishna Society, Dimapur Golden Jubilee benjungmung lapokja milen tsülokba noksa nung angur. 

Dimapur, April 22 (TYO): Tanü Honibarnü Duncan Bosti, Dimapur nung Shri Ramakrishna Society Dimapur küm 50 ajungba Golden Jubilee mong “Service to mankind” omen nung ajemdaker mungogo, aser iba sentong nung tongti tesemdangerji Urban Development Advisor, SI Jamir liasü.
Iba sentong nung jembidang SI Jamir-i, Ramakrishna Society-i nüngdakba nüburtem dang shisaliok lenmang sayutsü atema nükjidong yur inyakbaji nüburtem, talisa Naga nunger tenzükba tulutiba lir, ta metetdaktsü.
Ramakrishna Society-i Naga nunger, talisa Dimapur nung alirtem atema mangdang tulu yur inyak, aser Nagaland mepetmesü tensa tulu alidang lendong metsübui nüburtem tenzüktsü atema telemtetba agi, aser iba atema ajaki pelar, ta paisa ashi.
Maneni Society-i school tanurtem higher education atema inyaktsü imlar aser iba atema sensotemia akokba tashi nungita yaritsü, ta paisa shisem.
Iba sentong nung Sri Ramakrishna Society Tiri lokti pelaa agizük aser Viveknanaba Blooming Bud School kaketshirtemia temeja ken tajung ka tena liasü.