Delhi Public School Dimapur nung ‘Earth Day 2017’ mungogo

Dimapur, April 22 (TYO): Lipoküm kümzüka ayutsü aser kaketshirtem nem lipoküm asoshi tebilemtsütem angatetdaktsütsü asoshi, April 22, 2017 nü Delhi Public School (DPS) nung World Earth Day-2017 mungogo.
Iba den külemi sobaliba sentong, süngdong atemba, lokti yimyim ayimba, literary aser arts tetoktepbatem agiba den ano DPS Dimapur-i 1buba Inter School Cross Country Race (A 4km run from Green Park junction 5th Mile to DPS Campus) sentonga ayonga liasü. Iba asemtepba nung school 8 nungi shilem agir ajak agi parnok nisung 264 liasü.
Asemtepba nung Greenwood Hr Sec. School nungi Letginlun Hangsing-i mezüng jenjang nung takok angu aser pa sülen Carmel Hr. Sec. School nungi Nipuka Swu aser Hollotoli School nungi Huka Achumi nati tanabuba aser tasembuba jenjangtem nung takok angu.
Nagaland State Pollution Control Board nung mendenbuba, Wb. Meyipokyim Aier (IFS)-i iba asemtepba sentong amepdang 6:00 ako nung lapoktsü aser Sempet alemba sentong nunga Tongti tesemdanger liasü.
Pai, kaketshirtem den lipoküm tebilemtsütem lemsatep aser aji wazüka aser kümzüka ayutsüla, ta tayongzükba agütsü.