Manipur nung totzü abenba gari amakertem apu

Imphal, April 22 (Agencies): Taoba hopta Imphal-Dimapur highway kübok Kangpokpi district nung totzü abenba garitem amakba dak sendakba nung police-i Kuki Revolutionary Army (KRA) züngsem ta temulungi bilemba nisung 4 puogo.
Iba lendong ya taoba Mongulbarnep atalok aser nisung yiruba mesüra asüba kecha maliasü, saka injang agi totzü abenba gari ana khapok.
Osang kar angazükba sülen Kangpokpi, Imphal East aser Imphal West district police telok kati Hokolbarnep 4:00 ako meta Kangpokpi ward No 4 nung bushitepa aodang, nisung pezüji apu, ta police ajanga metetdaktsü.
Par pezüji Demminthang Haokip, Sagoulal Baite, Hengoulen Haokip aser Thanglanmoi Chongloi ta jangjaogo aser parnok ket nungi mobile phone 4 den SIM card 9 puogo, ta police-isa ashi.
Parnoki tashiyim agi sen saruba aser highway nung truck gari anirtem apuba nangzükogo. Par pezü ya telungpur teloktem den tesendaktep aliba kulitem nguogo aser asüngdangya maneni südar, ta police-isa shisem.
Mongulbarnü Chief minister, N Biren Singh-i transporter telok ana dang anogo 15 tsüngda totzü abenba gari amakertem aputsü ta nangzüka liasü.
All Manipur Petroleum Products Transporters Association aser All Manipur Petroleum Products Drivers Association-i iba tatalokba atema lungkak aittsü sentong liasü saka Biren-i nangzükba nung ajemdaker parnoki sentongji magitsü lemtet.
Manipur chief minister-isa telok ana dang national highway tem nung security akangshitsü ta nangzük.