MCI-i shiranger nem ‘generic’ mozütem agütsütsü tuyur

New Delhi, April 22 (Agencies): Linük nung temang anepalubaren nung sen endokba khuret ajema kümdaktsütsü atema Medical Council of India (MCI)-i hospital, doctor aser state medical council tem dang shiranger nem ‘generic’ mozütem agütsütsü atema tetuyuba agütsüogo.
‘Generic’ mozütem ya mozü company tulutemi yangluba mozütem ajizüka yanglubatem dang ajar. Item mozü ya company tulutemi yangluba den kasa saka jenjangbo kanga agi tajemba lir.
‘Generic’ mozü yanglurtemi ‘brand-name’ mozü yanglurtemi ama sen meindoker, kechiyong aiben ‘brand-name’ company temi mozüji mezüng bushiteta yanglur aser iba nung parnok sen aika endoker.
Prime Minister Narendra Modi-i India nung doctor temi shiranger nem ‘generic’ mozütem agütsütsü aser linük indang healthcare system ajanga nübor nem mozütem angati agütsütsü atema maparen inyaktsü atema ayongzükba sülen MCI-i iba tetuyuba agütsüogo.