Iba linük nung kechiba tetsürtem tesünep nung melitetter: SC

New Delhi, April 23 (Agencies): Linük nung tetsürtem anema inyakba kanga bulua atalokba nung ajemdaker tanü Supreme Court-i, iba linük nung kechiba tetsürtem tesünep nung meliteter, ta asüngdang.
Arishi küm 16 tetsür ka tebur kati mesushiba ajanga la soseta asüba ken o nung Himachal Pradesh High Court-i tebur ka aija küm tenet tepoukdak ayutsü obendang agütsü, iba sülen tebursang jagi Supreme Court nung temepishiba ka benokba angadangba mapang nung Justice Dipak Misra-i aniba bench-i, kechiba linük nung tetsürtem tesünep nung meliteter, ta asüngdang.
Tetsür ka dang kar meimtsü atema shingaia mekangshitsüla, ibaji la melung, ta shia Justices- Misra, A M Khanwilkar aser M M Shantanagoudar nungeri akumba bench-i, “Nisung ka meimtsü mesüra memeimtsüji la melung. Kar meimtsü atema shingaia la kangshitsü makok. Temeim indang tangatetba ka lir aser teburtemi ibaji agizüktettsüla,” ta ashi.
Ken o jembidang temepishiba benoksang atema jembitsür okatsür-i, tetsürlai tasütsü mapang tezüluba kuli agütsüba nungji temelung malemer, ta ashi.
Paisa, “Doctor-i ashiba agi la temanhji shilem 80 ronger liasü aser lai tezüluba nung kuli agütsütsüji tamakoktsü liasü. Lai o a mejembitet. La teka anaprong ronger liasü. Kuli agütsübaji magitsüla. Zülutsü mesüra o jembitsüsa la jenjang ka nung maliasü,” ta ashi.
Iba sülen bench-i, lai züluba kuli nung ajemdaker “la soseta asütsüsa nai tensa ka bener arütsü,” ta aitsü.