Karimganj nung nashi tepsetba atema nisung ana apu

Silchar, April 23 (Agencies): Hindu nunger lokti balala-i nashi tepseta ayokba nokdangtsü asoshi akhangba sülen anogo ka lir Karimganj district nung police-i nashi ka aouya tepsetba atema nisung ana puogo.
Fotehpur gaon panchayat kübok Sagarpar yimtsüng nung alir arishi küm 40 tain Abdul Basit aser Chatalgram yimtsüng nungi arishi küm 36 tain Anwar Hussain na nashi tepsetba dak sendakba nung puogo.
Local NGO nung züngsemtemi Karimganj SP dangi Subhash Namasudra indang nashi aouyartem aputsü asoshi tezüluba nung takhangba ka agütsü. Subhash ya Hindu Bengali lir aser pa Keotkona yimtsüng nung alir.
Aibelensang ana Honibar anepdang Kaliganj tesem nungi police temi apu.
Nilambazar police station nung nashidak sendakba ken o nung Parnok dang asüngdangya liasü. Denati ashiba agi, nashi aouya tepsetba nung ano tangar asem densema lir aser parnokji tang police-i tebushidak lir.