Dimapur nung Open House Awareness sentong ka katsüogo

Dimapur, April 24 (TYO): April 22, 2017 nü CHILDLINE Dimapur-i ayonga Ekrani Pathar, Dimapur nung “Bridge of Hope” tanurtem atema Open House Awareness sentong ka katsüogo.
Iba sentong ya tanurtem nem pei temetentem angatetdaktsütsü nükjidong nung ayong liasü.
Bridge of Hope ya maongka junga manguba tanurtem nem informal shisaliok tajung agütsütsü atema Believers Church-i inyakba project ka lir.
Iba dak alia tanurtem nem chiyungtsü, shisaliok kakettem aser counseling agütsür. Iba nunga lokti balala nungi tanur arishi küm pongu nungi küm 15 tsüngdapur tanur 100 shi lir.
Tanurtem den ghonda ka shi sentong agidang parnok dang pei temetentem indang tesayuba agütsü, iba den külemi parnoki mapang mashika nung 1098 ajanga CHILDLINE dang teyari meshitsü tesayuba agütsü.
Tanurtem jagi ken ka tena iba sentong tenzük, iba sülen sentong balala agi.
CHILDLINE coordinator, Kr. Lozua Kape-i asen temang nung shilem pezü kümzüka ayutsü indang tesayuba agütsüdang tanurtemi tenoktenoka angaa liasü.
Iba sentong tembanga tsürabur aser guardian atema information CHILDLINE pamphlets lemja liasü.