Nagaland nung National Panchayati Raj Day amung

Kohima, April 24 (TYO): Linük den külemi Nagaland nunga Rural Development Department-i National Panchayati Raj Day ayongzüka amung.
Iba sentong ya RD Directorate Conference Hall nung agi aser RD Director, Metsubo Jamir-i Panchayati Raj Act yangluba indang osang metetdaktsü.
Rural Development department dang asüngdangyaa Panchayati Raj Act ya benoktsü atema mapa inyak, kechiyong Nagaland nung Village Council Act liasü aser India sorkari Panchayati Raj Act nung Village Council Act nung aliba onüktem benoknüa liasü, ta Metsubo Jamir-i ashi.
1800 mapang nungi Panchayat tem liasü aser British nunger yimsüsüba mapang local self Government ya parnoki aginüa liasü saka ibaji ozüng ka ama meyanglu. Sorkari Village Council Act ama ozüng ka aginüa liasü aser ibaji ajanga centralization indang mapa tenzük, kechiyong linük ajungalen Panchayat shia nung pei pei inyakyim liasü aser town/ward shia nung inyakyim balala liasü, ta paisa shisem.
“Rural Development Department nung inyaker ajaki iba anogo atema nüma atangtsüla kechiyong 1992 nung India sorkari State Rural Development dang nungi asüngdangyaa Panchayati Raj Act ya mapa küma tenzük” ta RD Director-isa metetdaktsü.
Nagaland nungbo Panchayati Raj Act benoka mali kechiyong Act nung elections agia züngsemtem shimtsü lateta lir. Election indang inyakyimji State Election Commission ajanga Legislative Assembly nung MLA ka shimba den kasa lir aser Panchayat chairman nem tashi balaka agütsür, ta paisa ashi.
“Nagaland nung VDB 1238 lir aser asenok 73rd Amendment kübok madener. Ibaji ajanga asenokbo terenlok maparen inyaktsü atema tenokdangba kecha mali. Asen VDB tem ya tashitait rejutem lir aser asen state nung terenlok bener arutsü atema hadir tajung ka lir” ta Metsubo Jamir-isa shisem.
Iba sentong nung mendenji Joint Director, RD, K. Neibou Sekhose liasü, Joint Director, RD Neizovonuo-i temoatsü meshia sarasadem aser Additional Director tem- RD, Imlimeren Jamir o Nolegol Angami nati o jembi.
National jenjang nung Panchayati Raj Day ya Uttar Pradesh kübok Lucknow nung agi aser iba sentong nung Nagaland nung RD ketdangsertem aser VDB Secretary tem aden.