Centre-i Tribal Laws anema menokdaker saka UCC aginür: Minister PP Chaudhary

Agartala, April 25 (Agencies): Modi-i aniba sorkari lisopur sobaliba ozüngtem anema menokdaker saka ano Uniform Civil Code (UCC) ka aginür, ta Union Minister P.P. Chaudhary-i ashi.
BJP (Bharatiya Janata Party)-i aniba sorkari UCC pusemer saka onoki tribal tem indang ‘customary laws’ anema menokdaker, ta Mongulbarnü Agartala nung Minister of State for IT and Law and Justice, P.P. Chaudhary-i metetdaktsü.
“Parliamentary Standing Committee kati tribal customary laws indang report ka agütsüogo, saka Centre sorkari iba report atema telemtetba kecha magi lir” ta paisa osangbener dang ashi.
Union Minister-isa ashiba agi, Centre-i Triple Talaq dak sendakba onüktem lemtettsü atema mapa inyaker aser Nagaland, Meghalaya, Mizoram o Arunachal Pradesh state tem nung ‘customary laws’ kanga bulua amshir.
North east state tem nung lisopurtem aser local autonomous body temi tensa ajurudang local customary laws ajanga onüktem angatetteper. Lisopur indang customary laws ajanga village aser district council teloktemi telok mesüra kijatem tsüngda ken o tem benoka angadanger.
Village aser district council teloktemi lemtetba onüktem dak sendakba ken o tem atema High Court aser Supreme Court-i dang angadangtsü tashi lir.
Nagaland nung taoba Chief Minister T.R. Zeliang-i aniba state sorkari tetsür nem shilem 33 lemzükja urban civic bodies indang elections agitsü sangdongba sülen taküm February ita tensa mejungi aküm.
Naga tribal teloktemi tetsür nem shilem lemzüktsüba anema nokdak. Iba inyakyim ajanga customary laws nung kongshitsü aser Linük Temzüng Arrla 371-A nung Nagaland nem temeten agüja alibatem samatsütsü ta Naga tribal teloktemi ashir.
Parnoki tekong meranga nokdakba ajanga TR Zeliang-i chief minister menden toktsütsüsa aküm aser Naga People’s Front tanishir Shurhozelie Liezietsu-i Nagaland nung Chief Minister 17 buba inyaktsü agizük.