Nagaland nung malaria agi shirangba ajema akümer

Kohima, April 25 (TYO): Nagaland nung malaria agi shirangba tatalokba kanga ajema kümogo aser 2016 nungbo malaria agi shiranga asüba ka danga maliasü.
Tang Nagaland nung malaria agi shiranger 828 lir aser iba osang ya 2009 küm Mokokchung district kübok Mangkonglemba nung malaria kanga bulua adokdang, nisung 20 taküm samaba sülen bushiba lir, ta Joint Director & State Programme Officer NVBDCP, Dr Kevichusa Medikhru-i osangbener dang ashi.
Mongulbarnü Directorate of Health and Family Welfare nung World Malaria Day (WMD) sentong amungdang Dr Kevichusa-i iba osang metetdaktsü. Taküm omenji ‘End malaria for good’ liasü.
Nagaland ya category 2 (pre-elimination phase) kübok adener aser iba nung Annual Parasite Incidence (API) ji nisung 1000 nungi ka dak atongba lir.
2014 küm Longleng nung prevalent rate 3.67 liasü saka tang ibaji 1.14 ajema kümogo aser Mokokchung nunga 2.84 aliba nungi 1.06 ajemogo, ta paisa ashi.
Department-i Longleng aser Wokha district tem nung temulung agütsür kechiyong küm ishika district ana nung malaria samatsütsü atema mapa kanga bulua meinyak. Department-isa international arrtsü aliba Mon, Tuensang, Kiphire aser Phek district tem atema kanga süoki ia bilemer, ta Dr Kevichusa-isa shisem.
India sorkar nungi senotsü aruba ajanga department-i 2016 küm Long-lasting Insecticidal Nets (LLINs) lakh 9 ser meyirjang 14 lemogo. Ajisüaka, nisung aikati iba net mamshiba atema sasa bilemer. LLIN nung mozü enoka alibaji küm pungu atema dang lir anungji nisung ajaki malaria nungi jenbua alitsü atema iba net amshitsüla, ta paisa mepishia metetdaktsü.
Ano nisungtemi Indoor Residual Spraying (IRS) – Dichlorodiphenyltrichloroethane (DDT) mamshiba atema Dr Kevichusa-i sasa bilemba metetdaktsü.
Osangbener senden nung Deputy Director, Dr Neisakho Kera-ia o jembidang, “kobi melii government aser private health sectors ajak nung malaria ya ‘notifiable disease’ ta sangdongtsü aser iba sülen private health sectors-i malaria putetba ajak bangdak department nem osang agütsütsüsa akümtsü,” ta ashi.
Taküm tzünglu kanga karara arur aser iba ajanga Dimapur nung tzü atsüngdenba aser kilentzü yimdokdak tangbangba ajanga malaria adoktsü akok, ta Dr Medikhru-isa ashi.
Department-i Dimapur jila nung aliba kilentzü yimdokdak reprangdangogo aser tasazükji kilometer 1600 shi lir. Kilentzü ayimdak ajak nung Gambusia affins ta ajaba merla entsü achiba ango chiokogo, ta paisa shisem.
Nagaland state nung 2030 küm tashi nung malaria agientsü atema alizüng atema Urban Development, Agriculture, Public Health Engineering, Work and Housing, Municipals, Fisheries, Education, NGOs, Private Health Providers amalatemia yariteptsüla, ta Dr Medikhru-isa metetdaktsü.