State Badminton championship nung takok angur NSA-i tushi

Mokokchung, August 17 (TYO): Zunheboto district nung tawa 39 buba Yonex Sunrise Inter district & State Badminton Open Championship akadang Native Shuttlers Association Mopungchuket nungi takok tajung nguteter nem tenüngsang agütsüba sentong ka yimtsüng community hall nung August 17, 2015 anogo ayonga takok ngua agiogo.
Sentong nung Kajen Aier NSAM Tir-i jembidang par telok ya yimtsüng nung alir nisung 15-i bangjemtepa yimtsüng nung aliba lanurtem kar danga tangari meteta state aser national level tashi nung asayatettsüsa adokdaktsütsü nükla yur tenteta nüken belem arema inyaka aruba asangsang nung takok nguteta aruba atema pelar ta ashi. Paisa iba telok tangbo nisung 20 tema jungogo aser NSAM ya Mokokchung district badminton association kübok mezüngbuba affiliate asüba telok ka lir ta ashi.
Sentong nungsa tenüngsang agütsüba olen lenla balala nungi jembidang putu nem takok bentsür aruba tenüng asanger aser takok anguba ajanga nisung aika asüküma akümer anungji tali ajemalushir ajaki hau ta sütettsüsa alitsüla ta Riongsanger Putu nungi yimsüsür kati ashi.Takok tajung ngutetba ya kidang tsürabur kisüngi yariba agibo metongtettsü liasü saka NSAM-i anir ajaki bendanga agüja nungita aruba ajanga lir ta takok angur rongnungi tsürbur kati ashi. Tanü tetoktepba lima ka nung alidang lanurtemi asaya ajanga khonang bener aruba den shisaliokji mezüng südaktsür ora tetsükdatsü kecha makai ajak nung shilem agia otettsü ta VEC nungi jembidang ashi.
Sentong nungsa takok nguteter nungi Aoti-i jembidang nisung shia-i asen nem agütsüba sempetji angateta Tsüngrem akhümtsübua tim lenmang nung amshira takok khonangji bener arutettsü aser parnoki takok angubaji yimertem tamang sarasadem ajanga lir ta ashi.
Taküm 39 buba Yonex Sunrise Inter district & State Badminton Open Championship nung Native shuttlers Association Mopungchuket nungi takok ngutetertemji, Aoti Under 13 (Boys) doubles Champion , Temjentoshi Junior (Boys) doubles champion aser Putusenla under 17 (Girls) single runners-up ta liasü.