Assam nung lokti 6 nem ST jenjang agütsütsü asoshi lemtep

Guwahati, April 25 (Agencies): Hombarnü New Delhi, North block nung Centre, state aser lokti 6 nungi lenirtem senden nung Centre-i item lokti nem ST jenjang agütsütsü asoshi parnoki molungteter aliba lemsatepaka, Assam nungi lokti 6-i parnok nem ST jenjang agütsütsüba maparen monuba atema mepelaba lemsatepa liasü.
Union minister of state, home affairs Kiren Rijiju-i ashiba agi, item lokti nem ST jenjang agütsütsü asoshi Centre sorkari jenjang shidak agi odar. “Centre-i Assam nung OBC lokti 6 nem ST jenjang agütsütsü asoshi melungteter lir. Center sorkari iba ken o asadangtsü asoshi committee ka shimogo. Onoki iba dak sendakba nung maparen balala inyakdar,” ta Rijiju-i ashi.
Osang ka ajanga ashiba Centre, Assam sorkar, lokti 6, Adivasi National Convention (ANC) aser All-Koch Rajbongshi Students’ Union-P (Akrsu-P) pur tsüngda senden kanga süngjema agiogo. Iba senden nung Rijiju aser Assam minister for commerce and industry Chandra Mohan Patowary nati lokti 6 nungi teshimtet züngsemtem den ajurutepa sensaksema liasü. ST jenjang meshiba lokti 6 temji; Koch Rajbongshis, Morans, Motoks, Tai Ahoms, Chutias aser Adivasis (Tea Tribes) lir.
ANC puri Assam nung Adivasi lokti atema ST jenjang meshiba den külemi 2012 küm telungpur temai adokertem dak sendakba nung parnok atema talidak tesem aser tanga tenüngdakbatem agütsütsü asoshi khanga arudar. Akrsu-P puria parnok sobaliba, oshi aser yimden yimsüsübaren nung parnok temeden kümzüka ayutsü asoshi Koch Rajbongshis lokti atema ST jenjang kanga arudar.
ST jenjang agütsütsü asoshi asadangba committee ajanga parnok ST jenjang anguba sülen maparen balala nung menden wazüka toktsütsüba amala maparentem asadangdar. Item lokti 6-i Centre dang parnok nem ST jenjang agütsütsüba nung parnok ajangzüktsü asoshi tasa balala asaa monura parnoki longkak aitba sentong ayongtsü ta amokmeren. Committee ajanga June 30 nü parnok osang agütsütsü.
“Centre-i report agütsütsü menura onoki ajemajema malitsü. Centre nung sorkar kümtetba sülena sorkari onok nem ST jenjang agütsütsü sür joko ita aika süiogo,” ta Akrsu faction tir Hiteswar Barman-i ashi.
Kasa mapang nung Mongolbarnü New Delhi nung kuli kaket tejangja makai Assam nung bendanglen nungi arua alirtem dak sendakba nung sensaksemba ajanga jenjang tajungba ka lapoktsü ta ASSU-i temolung lema bilemer. Iba senden Union home minister Rajnath Singh lenisüba kübok agia liasü.