J&K-i Kashmir nung ita ka Internet Services anentsür

Srinagar, April 26 (Agencies): Tanü Jammu & Kashmir sorkari Kashmir nung ita ka piyong internet services anentsütsü atema tetuyuba ka agütsüogo.
Home Department-i, sangdong tasen ka magütsü tashi Kashmir nung internet services ita ka anentsütsü, ta metetdaktsü.
Indian Telegraph Act aser Information Technology Act kübok agüja aliba tashi nung ajemdaker state home department-i internet services anentsür, ta ketdangsertemi metetdaktsü.
Tang tashi nungbo iba tetuyuba jagi internet services ajak kongshitsü asü mobile internet services dang kongshitsü’ar mejangja, ajisüaka mobile internet service bo April 17, 2017 nü nungi anenja lir.
Security sepaitemi tashi alia amshir, ta aija kaketshirtemi longkak ait tenzükba sülen olulu proka tensa tamajungma mekümdaktsütsü nükjidong nung Hombarnü mobile internet services anenja liasü.