Saina Nehwal taküm otsü film nung Shraddha Kapoor-i shilem agitsü

April 26, 2017 (Agencies): Bollywood actress Shraddha Kapoor taküm küm tsüngda nung Haseena: The Queen Of Mumbai, Half Girlfriend film nung shilem agiba sülen tawa Saina Nehwal indang taküm otsü film yanglutsüba aliba nung shilem agitsü asoshi janjgaogo.
Romantic drama Aashiqui 2 nung shilem agiba sülen la nüngtugu aküm aser tawa Amole Gupte-i direct asütsü aliba India tsür nüngtugu badminton asayar Saina Nehwal taküm otsü film nung lai shilem agitsü. Shraddha-i Twitter ajanga la nem iba maongka agütsüba atema pelaba lemsatepa liasü.
“SAINA NEHWAL- taoba mapang tetsür badminton asayar rongnung world No. 1. India tsür. Nisung aika asoshi nükrangdong. La temaba jenjang tongtetba otsü kana jangratemtsüka lir aser ni ‘SAINA’ film nung la shilem agitsü asoshi maongka anguba atema kanga pelar,” ta lai zülutsü.
Lai maneni ashiba agi, la tang tashi inyaka aruba mapatem rongnung iba mapa ya tasakba asütsü. “Film atema renemshitsübaji kanga tasak asütsü. tana tashi film nung shilem agia aruba rongnung iba film nung shilem agitsüba ya tasakba asütsü,” ta lai shisem.
Aji saka Bollywood nung nisung taküm otsü film yangluba nung shilem agiba la asoshi tang ya mezüng masü. Anogo ana tejakdang ang la Haseena: The Queen Of Mumbai film nung Dawood Ibrhaim tenu Haseena Parkar shilem agiba poster sayaa liasü.
Bollywood nung asayartem taküm otsü aika yanglua arudar. Farhan Akhtar-i Bhaag Milkha Bhaag film nung, Priyanka Chopra-i Mary Kom film nung aser Sushant Singh Rajput-i MS Dhoni: The Untold Story film nung shilem agiba ajanga parnok career nung kanga tongtibang shilem agiogo. Anungji ‘SAINA’ film nung Shraddha-i shilem agiba ajanga la career temaba jenjang kati ajungkettsü imlar.