Assam nung tesayurtem longkak ait

Guwahati, April 26 (Agencies): Mongolbarnü All India Primary Teachers’ Federation-i Right to Education (RTE) Act mapa küma inyaktsüba aser tesayurtem mapa nungi anener külen ‘social security’ agütsütsüba khanga linük ajunga nung longkak aitba sentong ka ayongzüka agi. Iba longkak aitba sentong ajanga Assam nung primary school meyirejang 40 tashi shibanga liasü.
State nung lower primary school tem nungi tesayur lakh 1 dak temai iba longkak aitba sentong nung, Sarva Siksha Abhiyan kübok tesayurtem mapa nung ‘regularize’ sütsütsü asoshi akhang. Tesayurtemi education block 138 nung mener longkak aitba sentong ka agia liasü aser parnok takhangba mataloktsüra iba amala sentong maneni ayongzüka agitsü ta amokmeren.
“Assam nung lower primary school tem class shia atemaa takdang kakata alakteta makai dang school agidar. Aji dang masü primary education sector nung tesayurtem ajema lir. RTE Act mapa küma inyak tenzükba sülena school tem nung kiojen aser tanga temelenshi kecha mangur,” ta Assam State Primary Teachers’ Association tir Jiban Chandra Borah-i ashi.
Longkak aitertemi ‘contract’ nung aliba tesayur 16,000 mapa nung regular kümdaktsütsüba aser lower primary school tesayur parnok 30,000 pension scheme nung züngoksemtsüba atema khanga liasü.
“Onoki pension scheme tasenba indoker tejenba asentenshia amshitsü asoshi akhanger,” ta association ajanga PM Narendra Modi dangi tezüluba nung takhangba ka agütsü. Parnoki maneni tesayurtem aser elementary education nung tebilemtsü adokbatem achaayangtsü asoshi national commission ka dentettsü asoshi akhang.