BTAD kübok tanga kin loktitemi longkak aitsü amokmeren

Guwahati, April 26 (Agencies): Bodoland Territorial Area District (BTAD) nung tanga loktitemi, Bodoland state balaka kümtettsüba takhangba nung Centre-i lokti ka dang ajunga asaa telemtetba agira, parnoki taruba ita longkak aitba sentong ka ayongzüktsü ta amokmeren. Bodo nunger-i parnok asoshi state balaka akhangba dak sendakba nung All Bodo Students Union (ABSU) aser Centre sorkar na jembishinü tenzükogo.
“NDA sorkari BTAD kümtettsüba telemtetba agiba yaa lokti ka ajungtsü atema dang liasü, kechiyong district nung Bodo nunger dang nungi tanga kin nütsüng yongsük timba lir, saka item lokti den kecha sensaksem makai dang iba telemtetba agi. Anungji state balaka kümtettsü asoshi akhangba onoki anemer,” ta Mongolbarnü MP Naba Kumar Sarania-i ashi.
“Centre sorkari Bodo land dak sendakba ken o jembishinü nung tang kin loktitem sendokra onoki May ita nungi tenzüka longkak aitba sentong ayongtsü. Ajaki agizüktettsüsa telemtetba ka agitsü asoshi Bodo nunger, Centre aser aser tanga kin lokti nungi züngsemtem senden ka akatsü asoshi onoki benokdanger. BTAD kümtetba ya ‘democratic’ yimya nung meinyak, kechiyong iba telemtetba ya tanga kin tem tejangraba anema liasü. Sixth scheduled-i yimsü asüba tesemtem nung tanga kin shilem 80 lir,” ta Sanmilito Jonogosthiya Oikya Mancha (SJOM ) coordinator, Brajen Mahanta-i ashi.
Mahanta-i ashiba agi, BTAD kümtetba sülen nungi iba tesem nung kin tsüngda rarabangsen tali adokba ajangshiogo aser iba den temzüng ozüng raksaba tebilemtsü tali kümogo.
“Tanüa Adivasi nunger aika ‘relief camp’ aser tejenokdak balala nun lidar, kechiyong parnok ki tem kin tsüngda mangatettep adokdang rongtokja liasü,” ta paisa shisem.