Manipur CM Biren Singh-i anogo 100 sentong sangdongtsü

Imphal, April 26 (Agencies): Mongolbarnü Manipur Chief Minister, N Biren Singh-i, Cabinet senden ka amenba sülen anogo ishika tsüngda state sorkari anogo 100 indang sentong sangdongtsü, ta metetdaktsü.
Paisa, “Sorkar indang tongtibangtiba nükjidongji state nung telok balala tsüngda apo latsütsü atema lir,” ta ashi.
Paisa, “Taruba ita sorkari Khuman Lampak sports complex nung sports academic sessions tenzüktsü,” ta metetdaktsü.
Manipur sorkari Koutruk nung aliba sports university complex anasa helicopter anendak ka yanglutsü aser complex tashi gari lenmang yanglutsü, aser taruba ita Ato kilonser, Narendra Modi-i iba atemaji lung azüngtsütsü, ta paisa metetdaktsü.
“Traffic timtem koktettsü atema Imphal East aser Imphal West indang traffic police lokteptsü aser Superintendent of Police kübok wing ka tentettsü. Iba dak alia cyber crimes atema police station temeja ka tentettsü,” ta paisa ashi.
State BJP executive züngsemtem dang kanga nendaka inyaktsüla aser nüburtemi imlaba ama inyaktsüla, ta ajungshia pai, “Sorkari Centre indang schemes ajak inyakra BJP-i Lok Sabha election atema nübo ayimtsü menüngdaktsü,” ta ashi.