Kohima nung Azad Hind Museum ka lapoktsü

Kohima, April 26 (TYO): Phek district kübok Ruzazho yimtsüng nung anogo ananü “The Battle of Kohima and its impact on Indian Freedom Movement” shisatokden alidang Kohima nung Azad Hind Museum ka lapoktsü bangzünga renemogo.
Shisatokden nung shisalen sayurtem, tayongertem aser tadenertemi iba telemtetbaji Bodbarnü agi.
Azad Hind Provisional Government tekolak aser Indian National Army (INA) Supreme Commander, Netaji Subash Chandra Bose-i World War-II mapang Ruzazho yimtsüng semdang.
Ruzazho nung anogo ananü shisatokden alidang iba yimtsüng dang National Heritage village ta ajatsüla ta tesentepertemi telemtetba agi.
“Nagaland yimtiba Kohima nung Azad Hind Museum ka lapoktsüla aser iba nung Netaji aser INA dak sendakba osettem, uniform aser wako ayutsü. Iba museum nung INA-i amshiba Azad Hind currency, kakettem aser film tem ayutsüla” ta shisatokden nung adenertemi telemtetba agi.
Nagaland nung INA senzüba lenmangtem ajak meteta ayutsü aser Jessami, Sangshak, Sangnyu, Sahpao, Lahe, Ruzazho, Chosezu, Viswema, Mao den Kohima aser temeket nung nüngshilungtem yanglutsü atema parnokia telemtetba agi.
Nagaland aser Manipur nung INA-i mapa inyakbatem indang otsü bushitsü aser ibaji India public atema yimjak nung sayutsü atema State aser Centre sorkartemi mapa inyaktsüla, ta parnokisa lemtet.
Iba shisatokden sentong ya Pfutsero Government College-i Netaji Subash Chandra Bose Memorial Development Society Nagaland aser Chakhesang Students Union, Phek na den yaritepa ayongzük.
Linük tesem balala nungi shisashirtem, putiotsü bushirtem, professor tem aika iba sentong nung aden.