Tarutsü tia latettsü atema Naga nunger dak temeten lir: NSCN-IM

Guwahati, April 27 (Agencies): Centre den ceasefire yanglua aliba telok, NSCN-IM-i, Naga nungeri parnok tarutsü tia latettsü atema Naga nunger dak temeten lir, ta metetdaktsü.
Brihostibarnü NSCN-IM-i sangdong ka ajanga, “NSCN-i Naga tribal Councils aser Arogotem densema Naga nunger lokti balala den jembitsü atema mera agi. NSCN-i Naga nunger lokti tentettem den jembiba mapang parnoki tang India aser NSCN na tsüngda yimjung ken o nung akokba tashi nungittsü metetdaktsüogo,” ta ashi.
Parnokisa, “Ibaji meyipja NSCN-ia tesüiba mapangtem toktsür Naga nunger ajak dang yimjung maparen nung shilem agitsü atema tayongzükba ola agütsüogo. Tang teinyakdak maparen ya NSCN aser Naga nunger lokti tentettem tsüngda tangatettep tajung kati arua, India den ken o jembidang NSCN ji Naga nunger taginüba aser temetentem asoshi jembirtem lir ta asütsü atema lir,” ta ashi.
“Akhidang nungi aliba ali ka küma longjemtsü- Nagalim ji Naga nunger taginüba lir. Naga nungerji parnok meyong li nung alir,” ta NSCN-IM-i shisem.
NSCN-IM-isa, “Naga nungeri külemi linübaji kecha balaka masü saka tim dang. Naga nunger maneni pei li nungsa alitsü, ajisüaka atangji putiotsü kaji, British nunger aser India-i Nagalim ya mashimashi lemsatsü. Anungji Naga nungeri pei maitsü aser temetentem atema pei litsü longjemner. Iba jagi Naga nungeri pei tarutsü tia lemtettsü atema temeten aginüba sayur,” ta metetdaktsü.