NTC-i sorkar nem tenüngsang agütsü

Kohima, April 27 (TYO): Chief Minister, Shurhozelie Liezietsu-i aniba state sorkari, Rongmei kinji Nagaland nung indigenous Naga tribe rongnung ka ta züngokba meyipa agiba atema sorkar nem tenüngsang agütsür, ta tanü Media Cell, NTC-i sangdong ka nung metetdaktsü.
Cabinet-i telemtetba agiba ajanga tangbo iba mangatettep ken o aser iba ken o ajanga lokti balala tsüngda mepetmesü aliba agienogo, ta NTC-isa ashi.
“Iba ya shisa taka telemtetba ka lir aser yimtenren nung shisa taka mapa ka lir, anungji iba telemtetba pelaa agizüker,” ta sangdong nungsa shia lir.
Ano külen NTC-isa sorkar dang Rongmei indigenous inhabitants parnok 1313 aser parnok dak jakzükertem züngsemba atema kanga kümdanga inyaktsüla, ta metetdaktsü.
Jungjunga bushisüngdang mesüi tang züngoka alirtem agizükbaji inyakyim den mapet süra ibajibo tashishitsü asütsü, ta NTC sangdong nungsa shia lir.