India nung mobile amshir million 895.258 lir

Mumbai, April 28 (Agencies): India nung telecom industry nung terenlok ya anogoshia ainer aser 2017 March ita kisüng nung mobile alir million 5.68 liasü.
Cellular Operators Association of India (COAI) ajanga sangdongba nung 2017 küm March ita tashi nung India nung mobile amshir million 895.258 jungogo aser item rongnung Reliance Jio Infocomm Ltd indanga tensema lir.
2017 küm March ita tatem tashi nung Reliance Jio maten mobile amshir nisung million 823.10 lir, ta TRAI ajanga metetdaktsü.
Telecom company rongnung Bharti Airtel amshir timba lir. Iba network amshir ya March ita nung tasen million 3.00 liasü aser iba network amshir ajak agi nisung million 273.65 jungogo.
Airtel sülen ya tanabuba jenjang nung Vodafone lir aser iba network amshir nisung million 209.06 lir. Idea Cellular amshir million 195.37 aser Reliance Jio amshir million 72.158 lir.
Telecom market nung Bharti Airtel indang shilem 33.25 lir.
COAI ajanga India linük ajunga nung mobile amshir asadanger aser iba telok ajanga bushitetba agi March ita tashi nung UP East nung mobile amshir million 75.10 lir.
Maharashtra ya tanabuba jenjang nung lir aser iba state nung nisung million 70.63-i mobile amshir aser tasembuba jenjang nung Bihar lir. Iba state nung mobile amshir million 70.03 lir.
March ita nung mobile network tasen nung tenüng züluoker timba ji West Bengal aser Andaman & Nicobar Island tem lir aser item tesemtem nung tenüng tasen züluoker million 0.86 liasü.
“India nung ‘telecommunication’ tsütsü 2017 küm March ita kanga renlokogo. Tenüng tasen züluoker timba akümba ama linük nung tesem ajunga nung mobile amshir renloka aor. Iba terenlok ajanga sorkar indang ‘Digital India’ sentong kinük ajunga nungi amshitettsü,” ta COAI nung Director General, Rajan S Mathews-i ashi.
“Andaman & Nicobar Island tem nung ‘subscriber’ timba akümba ngua temolung nung tajungshiba ka arur. Item tesemtem ya India linük nungi talangka bilar lir, saka item tesemtem nung mobile amshir timba akümba ajanga item tesemtem nung mobile indang osettem renloktsü sayur. Iba terenlok ajanga tarutsü anogotem nung ‘Digital India’, ‘Skill India’ aser ‘Make in India’ sentongtem nung teyari tulu angutsü,” ta Rajan-isa ashi.