Film yanglur Madhur tespettsü tasa asaba atema Model Preeti Jain küm 3 tepuokdak ayutsü

New Delhi, April 28 (Agencies) : Film yanglur, Madhur Bhandarkar tepsettsü tasa asaba ken o nung Mumbai nung okadak kati model Preeti Jain den nisung ana aitsüogo.
Bhandarkar-i la den shi nung medemer nangzükba meinyak ta tai tongloktsüla, Preeti Jain ya 2005 September ita nung apu.
Preeti Jain-i 2005 küm tangar nem taa agütsür Bhandarkar tepsetdaktsütsü merangba ajanga Mumbai civil aser sessions okadaki la küm asem tepuokdak ayutsü obendang agütsü.
Preeti Jain-i underworld don asüba politician kümer alisang Arun Gawli nem taa agütsür Bhandarkar tepsettsü ashiba atema la apu.
Lai Gawli atema inyaker ka nem mezüng shilem sen 70,000 agütsü. Ajisüaka ano Gawli atemasa inyaker ka, advocate Bagawe-i iba osangji Jain-i tamalen la nem film nung shilem agütsütsü ta shir la tashiyim agi raksatsüba atema Bhandarkar puang ta ashiba police ka dang ashiba sülen temai adok.
Jain-i police dangi züluba shidi nungji, “Bhandarkar-i la nem film nung shilem agütsütsü ta shia la den shi nung aiben medem, ajisüaka pai nangzükba ama meinyak,” ta lir. Laisa ano Bhandarkar-i la dangi iba dakji sendakba nung yokba SMS tema sayua liasü.