Linük nung ochimeshitiba state ji Karnataka lir

New Delhi, April 28 (Agencies): India linük nung ochimashi jenjang kanga ajema kümogo, ajisüaka taoba küm ka tsüngda nüburtemi public service balala atema sübokrem agütsüba senji crore 6,350 liasü, ta bushisüngdang ka ajanga bushitetogo.
CMS-Indian Corruption Study (CMS-ICS) 2017 ajanga ashiba agi, 2017 küm survey agiba kibongtem shilem 43-i taoba küm ka tsüngda public service nung ochimashi tali kümogo ta ashi. 2005 küm nungbo shilem 73-i public services nung ochimashi tali kümogo, ta telangzüba agüja liasü.
Iba bushisüngdang ajanga, police aser judicial service densema public service balala nung ochimashi jenjang ajema kümogo, ta bushitet.
2017 küm state 20 nungi public services 10 nung sübokrem agütsüba senji crore 6,350 shi lir ta asadangtet. 2005 küm nungbo sübokrem senji crore 20,500 tashi liasü.
State aika nung sübokrem agütsübaji, sen 100 nungi sen 500 tashi lir, ajisüaka kar nungbo sübokrem senji sen 10 tashiaa agütsüogo.
Police service nung sübokrem agütsübaji shilem 34 liasü, iba sülen land/housing (shilem 24), judicial (shilem 18) tax (shilem 15) aser PDS nung shilem 12 liasü.
Iba bushisüngdangba nung state 20 kübok yimtsüng aser jilatem nung aliba kibong 3,000-i shilem agia liasü.
State 20 nungi public service balala nung kibongtemi ochimashi ajangshibaji Karnataka nung timba (shilem 77) liasü, iba sülen Andhra Pradesh nung shilem 74, Tamil Nadu nung shilem 68, Maharashtra nung shilem 57, J&K nung shilem 44 aser Punjab nung shilem 42 liasü.
2005 küm kibongtemi ochimashi timba ajangshibaji Bihar nung shilem 74, J&K nung shilem 69, Odisha nung shilem 60, Rajasthan nung shilem 59 aser Tamil Nadu nung shilem 59 liasü.
Iba bushisüngdang ajangasa bushitetba agi, 2017 küm public services nung kibongtemi ochimashi tajemtiba ajangshibaji Himachal Pradesh nung shilem 3, iba sülen Kerala nung shilem 4 aser Chhattisgarh nung shilem 13 liasü.