Crown Prince-i India nung sen crore lakh 4.5 intoktsü: PM Modi

Dubai, August 17 (Agencies): Tanü Dubai nung aliba Cricket Stadium nüng India sensotem den jembiba mapang Ato kilonser Narendra Modi-i, United Arab Emirates (UAE) Crown Prince, Mohammad Bin Zayed Al Nahyan-i India nung sen lakh crore 4.5 intoka shishilembatsü nangzükogo, ta ashidang stadium sünga aliba sensotemi kanga pela agizük.
“Temulung melemtetra shingai nü den sen 10-a invest masütsü. Iba akhümtsübu ya India-i ajangzüktetogo aser iba ya alima ajungai agizükteter,” ta Ato kilonser-i ashi.
“Yangi (UAE) kü dang temeim aser akhümtsübu sayuba ya nisung ka kija dang sayuba masü. Iba ya India nunger nütsüng billion 1.25 dang sayur, kechiyong alima nung temelenshi tesemji India lir,” ta Modi-i ashi.
“India Ato kilonser kati küm 34 sülen ang UAE semdanger süaka, tamarener Crown Prince aser Dubai nung tamareneri mashishi, parnoki kü dang temeim dang sayu. Iba ya ni kodanga mamatettsü,” ta paisa ashi.
Modi-i jembiba shiaji Dubai stadium nung sentepa aliba senso 50,000-i kanga pela agizük.