US Labour Secretary atema Acosta shimogo

Washington, April 28 (Agencies) : US Senate-i Donald Trump indang Cabinet nung Labour Secretary asütsü asoshi Alexander Acosta shimogo, ta osang ajanga metetdaktsü.
Labour Department lenitsü asoshi Acosta ya Trump-i bilema aliba tanabuba nisung lir aser pa nem iba mapa Brihostibanrü benloktsüogo. Iba mapa asoshi vote sütepba mapang Acosta 60-38 agi takok angu.
Vote agitepba sentong ya Tir Donald Trump Tir mendeni tur anogo 100 ajungtsü anogo ka lia agi, ta osangkaket nung shia lir.
America nung mapa inyakertem tebilemtsü agi sünga akümba mapang ka nung tesüiba mapang National Labour Relations Board (NLRB) nungi Republican züngsem, Acosta-i Labour Department tekolak asütsü mapa agizük.
Trump-i iba mapa asoshi mezüng benokba nisungji restaurant executive, Andrew Puzder liasü, ajisüaka Andrew-i February ita nung thitsüba ajanga pai thitsür tananüsa Acosta tenüng benok.
Puzder-i pa ket nung Republican telok nungi pusemer aika malitsü ta shisatetba sülen pa tenüng meyipa agi.
Iba sülen ano US Trade Representative asütsü asoshi Trump-i shimba, Robert Lighthizer tenüng Cabinet ajanga shimtsü aser ibai parnoki shimtsü aliba tesüsabuba menden asütsü, ta osang ajangasa ashi.
Senate Finance Committee-i Lighthizer tenüng Mongulbarnü agizüka yuogo aser pa nomination Senate rangbeni agizüka ayu.